Këmbëngulja për ta gjetur veten

Titujt Lajme

Marketing

Shkarko

Shkruar nga KosPress

E Martë, 29 Shtator 2009 10:46

Intervistë me këngëtarin Ardian Kajtazi, dhënë revistës “Zëri i Shqiptarit”.

Ardian Kajtazi u lind më 1984 në Prishtinë të Kosovës, në lagjen „Kodra e diellit“ (Sunnyhill). Për shkaqe të njohura të krizës politike në Kosovë, së bashku me familjen, që nga viti 1995 emigron në Gjermani. Që në moshën e re shquajti talentin e tij për këngën dhe muzikën. Më pastaj në një atmosferë të gjallë familjare së bashku me motrën Albulenën (që njihet me emrin krijues Lena Z beat dhe Argjirën e njohur me emrin prej artisteje Gjira më vitin 2004 themelojnë shtëpinë botuese muzikore „Sunnyhill Music“ .

Gjatë vitit 2005 Ardiani shkëlqeu me këngën e tij kënduar në anglisht „Why“ e cila edhe sot e kësaj dite me sukses degjohet e pëlqehet. Kohët e fundit Ardiani së bashku me Lena Z beat dhe Dirrty Deft e disa kompozitorë të tjerë, është duke punuar ne disa projekte, në vazhdën e muzikës RnB në skenën muzikore gjermane, ndërkombëtare dhe shqiptare. Ka pasur disa prezantime të suksesshme live në Zvicër dhe Gjermani, ndërsa në Zürich të Zvicrës, për herë të parë prezantoi hitin e tij tashmë të mirënjohur „Fshij lotët moj nënë“…

Paralelisht është duke i finalizuar një mori këngësh në shqipe dhe anglisht, ndërsa videoklipi më i ri i këngës “Nuk është lojë”, në muzikën e Done Beatz , dhe me tekstin e komponimin e vijës melodike të vokalit nga vetë Ardiani, ( praktikë kjo që është ndjekur në të gjitha këngët e tij) , dhe në produksion të “Sunnyhill Music“ tashmë është lansuar online edhe si videoklip në: (You Tube , Myspace..)

Pra, videoklipi i këngës “Nuk është lojë” u promovua sukseshëm këtë verë në RTV 21 dhe u është ofruar edhe mediumeve radiotelevizive shqiptare në Kosovë me synimin që kënga e tij të përfitojë sa më shumë artdashës të muzikës së mirëfilltë RnB. Ky ishte edhe shkasi për intervistën e parë dhënë opinionit tonë.

Zëri i Shqiptarit: Mund të na bëni një prezantim të shkurtër të portretit tuaj krijues?

Ardian Kajtazi: Unë jam një i ri tashmë 25 vjeçar i lindur në Prishtinë, ku kam pasur fatin të bëj vetëm 4 vjet shkollim fillor dhe pas emigrimit në Gjermani kam vazhduar shkollimin atje... Talentin për këngën, madje talentin për të bërë këngë, e kam nisur që nga Kosova, dhe me të ardhur në Gjermani, ishte vendimtare kitara qe e fitova si dhuratë për ditëlindje nga prindërit që ai të vetëzhvillohej!... Ishte vendimtar edhe prezantimi i talentit tim nga një gazetar që atëbotë, pra që në 1996 mikrofoni i tij kishte zënë një këngë timen, që duke e prezantuar në një radio të Kölnit, ku emetohej një emision në gjuhën shqipe, ka ndikuar shumë në motivimin tim prej fëmije... Ende më kumbon në kujtime refreni i asaj kënge që e kisha bërë vet, që shikuar nga perspektiva e sotme mund të them si ishte edhe një vizion: “...Do të vijë një ditë e uruar/ kur të gjithë shqiptarët do t´i gjejë të bashkuar!...” Atëbotë ishte barra e rëndë e jetës së bërë në Kosovë që e kishim mbi vete dhe ajo shpërthente edhe në këngët e mia, sepse e kisha shumë vështirë të pajtohesha me shkëputjen nga vendlindja, me humbjen e lidhjeve me familjen e gjerë, me shokët e fëmijërisë... Të adaptohesha në ambientin e ri, kur nuk e dije as një fjalë gjermanisht, nuk ishte e lehtë!... Ky ishte fillimi im dhe kënga u bë miku më i mirë që më shoqëronte ngushëllonte në atë kohë vetmie... për të vazhduar deri më tani...

Zëri i Shqiptarit: Keni filluar që herët të merreni me muzikë?

Ardian Kajtazi: Po, që nga mosha 10 vjeçare kam bërë përpjekje që të vetëzhvillohem... Bëra një kurs mësimi për kitarën dhe ajo më dëgjonte kur unë krijoja këngët e mia, tekstet e mia të këngëve... Në fillim kam kënduar këngë shqip, nuk e harroj këngën kushtuar “Venerës” dhe “Do të vijë një ditë e uruar!”, ndërsa pastaj pasojnë përpjekjet e mia që të këndoj në anglisht e ndonjëherë gjermanisht... E kësaj faze është kënga ime e parë e realizuar në studio profesionale “Why” që ka kohë që bënë jetën e saj aktive në internet ... Por, pas një përvoje disa vjeçare këngëtimi në anglisht dhe gjermanisht, këto tre vjetët e fundit iu kam kthyer këngëtimit shqip dhe me përvojën e arritur së pari në anglishte kam arritur që atë ta bartë edhe në shqip dhe besoj se ato shquhen për një origjinalitet të veçantë...

Zëri i Shqiptarit: Çfarë sjellni tek adhuruesi tuaj përmes këngës?

Ardian Kajtazi: Pikësëpari përpiqem që ajo të trajtoj momente të ndjeshme të jetës sonë bashkëkohore, posaçërisht bota emocionale e të rinjve tanë që ndërlidhet më jetën, dashurinë, gëzimet dhe thyerjet shpirtërore që ajo sjell, po edhe tema më të gjera jetësore. Në numrin e madh të këngëve të mia, ku tekstet dhe vijën melodoke të këngëtimit i krijoj vet në bazë të “bitit”, si po i themi ne sot, pra linjes muzikore që e bëjnë kompozitorët, edhe unë bëhem një krijues aktiv i këngës, sepse linjat kompozuese të vokalit i krijoj vet, duke arritur kështu që vetë të jap atë tingëllimin origjinal dhe të përjetuar nga zëri im. Pra muzika ime do të thosha se shquhet për ofrimin e një kënaqësie të veçantë,( entertaiment), dhe një nivel të arrirë muzikor, ku mbizotëron harmonia. Kjo harmoni vokale shpesh e gërshetuar me shumëzërshmëri, të gjitha të kënduara vetë në tonalitete të ndryshme, ato i bënë më dinamike, më kumbuese, duke e plotësuar vijën melodike, edhe në rastet kur ajo mund të jetë shumë e thjeshtë. Gërshëtimi maksimal i muzikës me vijën melodike të këngëtimit, pra vijës melodike të vokalit, dhe harmonizimi i tyre, janë kritere që i përcjell me një koncept rigoroz të harmonisë që tashmë më duket se e kam kultivuar deri në një ndjesi spontane dhe intuitive...

Zëri i Shqiptarit: Kryesisht këndoni në zhanrin “RnB”, pëlqeni edhe ndonjë zhanër tjetër?

Ardian Kajtazi: Unë jam rritur me këtë muzikë...Pos “RnB” me dëshirë këndoj e kompozoj edhe “Soul”... edhe ndonjë tashmë me elemente të gërshetuara të “Popi”- it apo “Hip-Hop” - it, por më dëshirë i gërshetoj elementet e”RnB” dhe “Soul”...

Zëri i Shqiptarit: Me cilët kompozitorë dhe tekstshkrues bashkëpunoni?

Ardian Kajtazi: Muzikën, apo tjesht “beats”, si po i themi sot, i kam pasur nga Lena Z beat , Don beats, Dirty Deff e ndonjë tjetër, ndërsa mbi bazën e tyre jam unë vetë që i krijoj tekstet e vijën melodike të vokalit, kjo bënë që edhe unë të ndjej thellësisht veten edhe si krijues të këngës, që do të thotë se nuk jam vetëm një këngëtar interpretues që e reprodukon atë që i ofron vetëm kompozitori!... Në studion time të punës krijuese bëj punë shumë komplekse muzikore, dhe vetëm kjo më ofron kënaqësi të veçantë...

Zëri i Shqiptarit: Tani keni lansuar videoklipin e këngës “Nuk është lojë”, klipi është i veçantë në llojin e tij. Ku e keni xhiruar atë dhe sa kanë zgjatur filmimet?

Ardian Kajtazi: Po pas një mori këngësh të realizuara në shqip, nuk e kisha lehtë që të përzgjedh këngën e parë për ta realizuar në videoklip. Doja që të gjej diç të veçantë që i shkon edhe sezonit . Kuptohet së koncepti si do të dukej videoklipi ka kërkuar më shumë kohë për ta ideuar, ndërsa edhe parapërgatitjet dhe skenave dhe ambienteve ku është dashur të bëhen xhirimet janë bërë asisoj që puna teknike e xhirimeve të mos na marrë më shumë se një ditë. Ato janë bërë në Gjermani, ndërsa poashtu edhe montimi mbi bazën e një rgjisure, që e kemi realzuar së bashku më producentën time Lena Z beat dhe shtëpinë botuese “Sunni-hill” do të kenë zgjatur më shumë... Promovimi i parë u bë në emisionin “Randevu” të RTV 21, ku kam qenë shumë i mirëpritur, dhe besoj se kjo këngë tashmë do të transmetohet edhe në RTV të Kosovës dhe radiotelevizionet e tjera...

Zëri i Shqiptarit: Ju këndoni edhe në gjuhën angleze, ku e gjeni veten me mirë në gjuhën shqipe apo angleze?

Ardian Kajtazi: Si fëmijë kam nisur me këngëtimin në shqip... Në Gjermani pastaj kam sprovuar vetën vazhdimisht me këngëtimin në anglisht dhe kam edhe disa këngë të kënduara gjermanisht. Vërtetë kam pasur si synim, që për mua ende është parësor, që të depërtoj edhe në skenën ndërkombërtare me këngët e mia, dhe kjo, si të shumë këngëtarë të nacionaliteteve të ndryshme, është më shumë e mundshme të arrihet përmes këngëtimit anglisht!... Por viteve të fundit po e ndjej se krijimi e këngëtimi në shqipe është më i dashur, më i përjetuar, edhe pse i zbërthyer me një gjuhë fare të thjeshtë, më ka dhënë një nxitje e kënaqësi edhe më të madhe për ta sprovuar vetën në muzikë...

Zëri i Shqiptarit: Interpretimi në skenë “live” prore është një sfidë për këngëtarin... Jeni i guximshëm në skenë?

Ardian Kajtazi: Skena të ofron një përjetim të veçantë, sidomos me këngëtimin “Live”, që unë e dua shumë, sepse sot po bëhen shumë komentime e thashethemnaja për kualitet reale te vokalit të shumë këngëtarëve interpretues!.... Unë i përkas kategorisë së këngëtarëve krijues, spse, po e përseris tashmë disa herë, unë bëj vetë komponimin e vijës melodike të vokalit, dhe kjo më jep një kënaqësi e liri të shprehurit edhe në interpretimin “Live”. Kjo besoj se të sfidon edhe më shumë që të ofrosh sa më të kompletuart vetveten dhe kjo donë edhe guxim për ta zotëruar skenën. E kam si qëllim të punës sime të mëtejshme që projektet e mia me kohë të interpretohen “Live” edhe me muzikën e interpretuar nga bendi. Kjo më krijon një emocion të veçantë dhe kështu nuk u krijohet hapësirë fare përfoljeve për kualitetet reale të këngëtimit!....Sot përflitet se të gjitha mund t´i bëj muzika e kompjutorizuar, madje të bënë edhe këngëtar edhe nëse nuk di të këndosh!?..., por kualiteti real e origjinal i vokalit dallohet e përcaktohet shumë lehtë edhe kur ai tashmë me teknikën e komjutorizuar të incizimit në studio përplotësohet me efekte teknike që mundëson ndonjëherë zhanri përkatës muzikor.

Zëri i Shqiptarit: Projekti më i afërt?

Ardian Kajtazi: Kontakti i vënë me rastin e promovimit të videoklipit të këngës “Nuk është lojë” me RTV 21 më krijoj një mundësi që të shoh edhe për modalitet e tjera të bashkëpunimit më këtë institucion profesional e serioz ... Shpresoj se videoklipin e dytë do ta realizoj në bashkëpunim me RTV 21 dhe me këtë mendoj që të organizoj edhe promovimin e albumit tim ku do të përfshijë një mori këngësh kryesisht në shqipe...

Zëri i Shqiptarit: Cila është marrëdhënia juaj me shtypin? A i lexoni gazetat? Cilat janë rubrikat që ju interesojnë?

Ardian Kajtazi: Kryesisht e përcjell shtypin gjerman dhe pos temave globale më intereson se si i qasen Ballkanit dhe temave shqiptare. Pra, përcjelli më vëmendje temat nga politka, më intereson shumë dhe ekonomia... Shpesh optika e vrojtimit për shqiptarët është tepër kritike, madje ka edhe shkrime tendencioze që më nevrikosin e që më bëjnë shpesh edhe t´u dërgoj komentet e mia prej lexuesi, sidomos për ato mjete që janë të lansuara edhe online përmes internetit...Ende shikohemi si dele e zezë mes të bardhave!...Më duket se ende ka qarqe te interesuara që të lansojnë dezinfomime për shqiptarët!...Shpresoj që me kohë ne shqiptarët të marrim një pozicion të veçantë dhe aktiv në Ballkan, dhe resurset e begata që kemi duhet t´i zhvillojmë që të dëshmojmë se mund të mbajmë e zhvillojmë vetveten!...

Zëri i Shqiptarit: Si është një familje artistësh?

Ardian Kajtazi: Funny!... Po një familje artisësh rritet duke u marrë secili me artin e vet, dhe duke e përcjell pëlqyer e kritikuar punën e njëri-tjetrit... . Në familjen time bashkëjeton muzika me artin, letërsinë, artin e kuzhinës... Ne shqiptarët jemi humoristë të fortë, dhe qeshim edhe kur nuk e kemi as një euro ne xhep! ...

Zëri i Shqiptarit: Cili është mesazhi juaj për këngëtarët e rinj?

Ardian Kajtazi: Mund ta them atë që praktikoj për vete: shumë punë këmbëngulëse për ta gjetur veten si artist!...E bëj muzikën që më pëlqen mua, e jo atë që e kërkon tregu!...

Vendos në FaceBook

Komente (40) add comment

fjolla said:

Je shume i mire

29 September, 2009

Ardi said:

Interviste ne nivel te larte. Duhet edhe kengetaret e rinj te mesohen se si duhet te pergjigjesh ne nje interviste, jo vetem me pergjigje amaterski. Te lumte Ardian, kenget e tua i ndegjoj ne internet, keni nje ze te mrekullueshem.

29 September, 2009

Komentoni