Organizata “Reporterët pa Kufij” dënon kërcënimet kundër gazetarëve investigativë në Kosovë, muajin e kaluar.

Duke përmendur tre raste në gazetat “Koha Ditore”, “Lajm” dhe “Zëri”, organizata thotë se në Kosovë ka një valë kërcënimesh kundër shtypit. “Është e papranueshme dhe shumë shqetësuese që policia dhe autoritetet e gjyqësisë refuzojnë të veprojnë mbi bazën e ankesave të gazetarëve rreth kërcënimeve”, thotë organizata me seli në Paris.

“U bëjmë thirrje autoriteteve evropiane që përmes misionit të EULEX-it, menjëherë ta adresojnë këtë kulturë të pandëshkueshmërisë”, thonë "Reporterët pa Kufij". Më tej, organizata i kritikon organet e rendit për mosefikasitetin e tyre në zbulimin e kërcënimeve ndaj gazetarëve.

“Ne nuk mund të pranojmë që hetimet e policisë nuk rezultojnë gjithmonë me sukses për identifikimin e kërcënuesit, por është tmerruese kur shihen zyrtarët që bëjnë çmos për t'i pamundësuar mediet nga të drejtat legjitime të tyre”, thuhet në reagim.

“Nëse Qeveria e Kosovës vërtet dëshiron t'i bashkëngjitet Bashkimit Evropian, ajo duhet të sigurojë respekt për të drejtën e medieve që t'i hetojnë të gjitha fushat e ekonomisë, sidomos kompanitë publike, të cilat menaxhohen dhe kontrollohen nga shtetit”, përfundon reagimi i organizatës “Reporterët pa Kufij”.